Mildi að ekki fór verr

Mildi þykir að aðeins einn skyldi farast þegar beljandi flóð og aurskriður féllu á íbúðarhverfi í Björgvin í Noregi, síðastliðna nótt. Skriðan féll um klukkan tvö í nótt þegar flestir voru í fastasvefni. Mikil skelfing greip um sig þegar fólk reyndi að flýja úr húsum sínum og þurftu sumir foreldrar að láta börn sín stökkva út um glugga á annarri hæð þegar þau yfirgáfu húsin. Erfitt reyndist fyrir björgunarmenn að ná íbúum sem lentu í skriðunum upp úr aurnum þar sem mikil hætta var á að hús kynnu að hrynja. Þeir unnu þó þrekvirki þegar þeir grófu íbúana upp með berum höndum og skóflum. Fjöggurra ára gömul stelpa og móðir hennar eru í lífshættu auk þess sem flytja þurfti sjö aðra íbúa á sjúkrahús. Úrhellisrigning hefur verið í Vestur-Noregi í gær og í dag í kjölfar leifa af fellibyljunum Maríu og Nate sem gengið hafa þar yfir. Um tíma var óttast að verslunarmiðstöð kynni að falla saman en það tókst að koma í veg fyrir það. Vatnselgur á götum gerir samgöngur erfiðar á svæðinu auk þess sem aurskriður hafa fallið á vegi við Björgvin.