Létu vita af bjarndýri með SMS

Tvö skelfingu lostin sænsk ungmenni sendu í gærkvöldi SMS-skilaboð til föður annars þeirra og sögðu að bjarndýr væri fyrir utan tjaldið þeirra þar sem þau voru í útilegu í Noregi. Faðirinn sendi skilaboð um hæl en ekkert frekara samband náðist við piltinn og stúlkuna sem bæði eru nítján ára gömul. Pabbinn varð auðvitað skelfingu lostinn líka og hafði samband við sænsk yfirvöld sem aftur höfðu samband við þau norsku. Það eina sem vitað var um ferðir parsins var að þau voru einhvers staðar í Femundsmarken í Heiðmörk í Noregi. Þar liggur land hátt og farsímasamband er gloppótt. Norðmenn sendu þegar vopnaða leitarmenn á vettvang en þeir fundu ekki næturstað unglinganna og náðu heldur ekki símasambandi við þá. Þegar birti í morgun var þyrla send á vettvang og hún fann fljótlega piltinn og stúlkuna, á göngu, og amaði ekkert að þeim. Bjarndýrið hafði hnusað í kringum tjald þeirra góða stund en svo haft sig á brott. Eins og vænta mátti létti öllum mjög við þennan endi á ævintýrinu.