Árleg kaupgeta 24 milljónir króna

Borgaryfirvöld úthlutuðu Listasafni Reykjavíkur 13,5 milljónum króna til listaverkakaupa fyrir árið 2005. Fjárhæðin var hækkuð fyrir nokkrum árum en var lengi 12 milljónir. Listasafn Íslands hefur úr 10,8 milljónum að spila þetta árið og koma þeir peningar úr ríkissjóði. Samanlagt hafa stóru söfnin tvö 24,3 milljónir til kaupa á listaverkum. Við þá fjárhæð bætast 3,5 milljónir króna sem Listasafn Reykjavíkur fær vegna útilistaverka en misjafnt er milli ára hvort peningarnir eru nýttir til kaupa á nýjum verkum eða framkvæmda vegna flutnings eða uppsetningar. Söfnin tvö kaupa árlega í kringum 40 listaverk hvort, samtals um 80 verk. Eins og fram kom í Fréttablaðinu í gær hyggst Sigurjón Sighvatsson kaupa verk Ólafs Elíassonar, Blinda skálann, og hefur kaupverðið verið talið um 30 milljónir króna. Þótt verðið sé mun hærra en nokkurt listasafn á Íslandi ræður við að greiða eru heimildarmenn blaðsins úr listalífinu sammála um að það sé fjarri því að vera of hátt. Ólafur Elíasson er í fremstu röð listamanna á sínu sviði í heiminum og verkið sem um ræðir var meðal annars sýnt á Feneyjatvíæringnum. Í því samhengi má líka benda á að verk samtímalistamanna seljast gjarnan á mun hærra verði, jafnvel svo hlaupi á hundruðum milljóna. Að sögn Eiríks Þorlákssonar, forstöðumanns Listasafns Reykjavíkur, kostaði dýrasta verkið sem keypt hefur verið í hans tíð hjá safninu á milli fjórar og fimm milljónir króna. Er það eftir áðurnefndan Ólaf Elíasson. Eiríkur segir erfitt að verðmeta heildar listarverkaeign safnins en ætlar að hún nemi milljörðum króna. Ólafur Kvaran, forstöðumaður Listasafns Íslands, fagnar kaupum Sigurjóns á verki Ólafs og segir ánægjulegt þegar einstaklingar fjárfesti í myndlist. Hann segir þó mikilvægt að listaverk sem svo háttar til um verði áfram sýnileg en ekki lokuð inni fáum til yndis.