Saklausir af landhelgisbrotum

Sjómenn við Húnaflóa telja að brengluð reglugerð um friðunarsvæði við strendur landsins hafi valdið því að skipstjórar bátanna, sem voru teknir fyrir meint landhelgisbrot í flóanum í fyrrinótt, hafi talið sig vera við veiðar utan friðunarsvæðis og því saklausa. Varðskip færði bátana til hafnar á Skagaströnd í gær þar sem matsmenn voru fengnir til að meta verðmæti afla og veiðarfæra þar sem algengt er að sektir útgerða nemi andvirði þeirra. Þá er búið að taka skýrslu af öðrum skipstjóranum og verður skýrsla tekin af hinum í dag en Sýslumaðurinn á Blönduósi annast rannsóknina. Í reglugerð númer 809 frá árinu 2002 um friðunarsvæði við Ísland er friðunarsvæðið í Húnaflóa utanverðum skilgreint með sjö viðmiðunarpunktum sem tilgreindir eru upp á gráður, mínútur og sekúndur. Sé hins vegar lesið lengra í reglugerðinni er áttundi punkturinn tilgreindur en miðað við línu dregna á milli ákveðinna viðmiðunarpunkta, og ef ekki er tekið tilliti til áttunda punktsins, er svæðið heldur minna en sjómennirnir héldu og það var einmitt á því svæði sem bátarnir voru teknir. Sjómenn við Húnaflóa segja að þeir hafi árum saman veitt óáreittir á þessu litla svæði í bestu trú um að það væri heimilt. Skipstjórarnir munu því væntanlega halda fram sakleysi sínu en jafnframt krefjast skýrari reglugerða um bannsvæði.