Gáttaður á áhuga Íslendinga

"Ég er alveg gáttaður á þessum áhuga Íslendinga á verkum mínum," segir færeyski myndlistarmaðurinn Hilmar Hoøgaard en hann hélt myndlistarsýningu í Eden í Hveragerði í síðasta mánuði.  Það er kannski ekki nema von að Hilmar sé gáttaður því hann mætti hingað til lands með þrjátíu og níu myndir en hafði aðeins með sér tæpan helming til baka en hinn helmingurinn prýðir stofur íslenskra myndlistarunnenda sem tóku HIlmari svo sannarlega vel. Hann var einnig upp með sér vegna peningaupphæðanna hér og þóttist hafa himin höndum tekið þegar verk hans seldust á tugi þúsunda króna en þó dróst aðeins úr kæti hans þegar honum varð ljóst að mikill munur er á íslensku og dönsku krónunni. En þó er hann ekki mikill efnishyggjumaður. "Ég kýs frekar að hafa gaman af lífinu," segir hann. "Þess vegna er ég til dæmis að vinna á sambýli fyrir fatlaða sem er mjög gefandi og skemmtilegt starf en ég lærði rafmagnsverkfræði en mér fannst ekkert skemmtilegt að eiga við það svo ég lít ekki við því lengur." Hilmar er frá bænum Toftum sem er vinabær Hveragerðis og var sýning hans liður í menningarlegu samstarfi bæjanna. Hann dvaldi í Hveragerði í hálfan mánuð eða á meðan á sýningunni stóð og ber hann Íslendingum vel söguna. "Þið eruð góðir grannar og margir hafa sagt mér að myndirnar mínar minni um margt á Ísland. Til dæmis er ég heillaður af sjónum og fiskimennsku eins og sést á verkum mínum og þetta leggst vel í Íslendingana," segir hann upp með sér. En verk Hilmars leggjast ekki aðeins vel í Íslendinga því undanfarin ár hefur orðstír hans sem myndlistarmanns farið vaxandi í heimalandi hans. "Þótt ég hafi alltaf málað var það ekki fyrr en í hittiðfyrra sem ég fór að gera þetta af einhverri alvöru og smátt og smátt er ég að "meika" það í Færeyjum. Gefðu mér tvö ár í viðbót og þá verð ég orðinn verulega frægur," segir Hilmar og hlær.