Krákan kvað Nixon ómögulegan

Flestir Íslendingar hafa einhvern tíma komið til Eden í Hveragerði. Reyndar eru erlendu ferðamennirnir einnig ófáir sem leggja leið sína þangað en það virðist vera hefð fyrir því hjá rútubílstjórum að koma við í Eden á ferðum sínum um Suðurland. Bragi Einarsson heitir eigandi þessa griðarstaðar og hefur verið það í tæp fimmtíu ár. En nú fer að verða breyting þar á því Bragi hefur ákveðið að selja Eden. "Það hefur aldrei verið meira að gera en nú og aðsóknin vex með hverju ári," segir Bragi þegar hann er spurður hvort nýr verslunarkjarni í Hveragerði sem er upp við þjóðveginn hafi ekki dregið úr aðsókninni hjá sér. "Útlendingunum fjölgar þó mest, ætli ég fái ekki nær alla erlenda ferðamenn sem til landsins koma," bætir hann sposkur við. Bragi hefur vakið athygli manna á Eden með ýmsum hætti í gegnum árin og eflaust muna einhverjir eftir kráku einni sem þar hélt til á sjöunda og áttunda áratugnum, Bragi útskýrir málið. "Ég var með kráku hérna sem hét Margrét og hún gat talað íslensku, dönsku og svo hrafl í ensku. Hún vakti oft kátínu hjá gestunum og mér er sérlega minnisstætt þegar bandarískir ferðamenn komu hingað og voru að ræða um mál sem þá voru ofarlega á baugi og því varð þeim tíðrætt um Nixon. En um leið og Margrét heyrði Nixon nefndan á nafn kvað hún við "no good!" og hristi hausinn. Þótti Bandaríkjamönnunum þetta til merkis um það að menn og dýr á norðurhjara veraldar væru vel að sér í heimsmálunum," segir Bragi og hlær við endurminningunni. Myndlistarsýningar eru tíðar í Eden og segir Bragi að oftast sé langur biðlisti eftir að fá að sýna í salnum. Bragi tekur hins vegar ekkert fyrir og segir nærveru myndlistamannanna vera næga borgun. "En nú er hins vegar kominn tími til að hætta þessu meðan ég stíg ennþá í báða fætur og láta yngri og kraftmeiri menn um hituna. Það verður svo örugglega ágætt að vakna upp til nýs veruleika," segir hann að lokum.