Heimsókn Taívana ergir Kínverja

Kínverjar eru æfir vegna komu utanríkisráðherra Taívans hingað til lands í dag og hafa í hótunum. Kínverska sendiráðið leitar allra leiða til að koma í veg fyrir heimsóknina. Sendinefnd frá Taívan með utanríkisráðherrann Dr. Tan Sun Chen í broddi fylkingar er væntanleg hingað til lands í dag. Farið hefur verið með heimsóknina eins og mannsmorð og hún er svo óformleg að jaðrar við leyndarmáli. Ástæðan er óttinn við reiði Kínverja, sem líta á Taívan sem uppreisnarhérað og viðurkenna ekki sjálfstæði landsins frekar en flestar aðrar þjóðir. Þeir taka því ekki vel þegar heimsóknir af þessu tagi eiga sér stað - sama með hvaða formerkjum. Samkvæmt heimildum fréttastofunnar hefur sendiráðið gert athugasemdir við íslenska utanríkisráðuneytið og meðal annars hótað því að viðskiptasamningum verði rift, jafnvel að reynt verði að spilla fyrir Íslendingum á alþjóðavettvangi. Fát kom á talsmann sendiskrifstofu Taívans í Kaupmannahöfn þegar fréttastofan hafði samband við hann og samkvæmt upplýsingum frá íslenska utanríkisráðuneytinu er heimsóknin ekki opinber, ekki er gert ráð fyrir því að ráðherrann hitti neina íslenska ráðamenn og litið er á sendinefndina sem hóp ferðamanna á eigin vegum. Allt er fólkið hér á landi með vegabréfsáritun sem ferðamenn. Það dugir þó ekki til að slá á reiði Kínverja sem munu hafa reynt hvað þeir gátu til að koma í veg fyrir heimsóknina. Þeir telja enda að það skipti engu að um ferðamannaheimsókn sé að ræða, heldur séu Taívan-búarnir hér til að blanda Íslandi í pólitískt áróðusstríð og að einskonar viðurkenning á stöðu Taívans felist í því að veita þeim sáritun í taívænsk vegabréf. Spenna mun vera innan utanríkisþjónustunnar vegna málsins og íslenskir kaupsýslumenn, sem gert hafa samninga við Kína nýverið, eru sagðir vita af óánægju Kínverjanna. Utanríkisráðherra Taívans hefur hins vegar á undanförnum misserum heimsótt meðal annars Tékkland og Frakkland án þess að fregnir hafi borist af neinum afleiðingum, og hann kemur hingað til lands frá Noregi, þar sem hann mun hafa átt fundi af ýmsu tagi.