700 neitað í Verzlunarskólanum

Álíka margir nýir nemendur sækja um að komast í framhaldsskóla nú og á síðasta ári, en sá árgangur var mjög stór og erfitt var að finna öllum stað í kerfinu. Nokkrir skólar hafa nú þegar lokið öllum nýskráningum, en það eru þeir skólar sem mest ásókn var í og fylltust í fyrstu skráningalotu. Óvenju mikil aðsókn var að Verslunarskóla Íslands, en 560 sóttu um hann sem aðalskóla en af þeim fengu aðeins 340 skólavist og rúmlega hundrað fleiri nemendum var vísað frá en í fyrra. Aðrir fimmhundruð nemendur sem valið höfðu skólann til vara áttu því enga von um að komast að. Aðstoðarskólastjóri Verslunarskólans taldi sennilegt að þetta væri mesta aðsókn í sögu skólans. Á síðasta ári var aðeins um hundrað vísað frá. Kvennaskólinn þurfti að vísa frá yfir helmingi umsækjenda. 256 sóttu um skólann sem fyrsta val en aðeins var tekið við 135 nýnemum. Þegar tekið er tillit til varaumsókna sem skólanum bárust hefur alls 187 umsóknum verið neitað. Óvenju margir voru teknir í Kvennaskólann á síðasta ári og því komust færri að í ár. Menntaskólinn í Reykjavík og Menntaskólinn við Hamrahlíð höfðu einnig lokið nýskráningum í gær. Rafrænt innritunarkerfi fyrir þá sem voru að ljúka grunnskóla virðist almennt vera að gefa góða raun. Fljótlegt er að senda umsóknir þeirra sem ekki komust inn í fyrsta valskóla yfir á næsta skóla og betri yfirsýn fæst yfir skráningarstöðuna í heild. Einn skólastjórnandi segist þó sakna þess að fá ekki meiri upplýsingar um nemendur, eins og til dæmis um skólasókn. Aðrir skólar eru að ljúka nýskráningum á næstunni. Þótt álíka margir séu að sækja um og á síðasta ári er ástandið þó ekki jafn erfitt. Vonast er til að allir sem þess óska komist í framhaldsnám.