Fékk vatnsgusu á frumsýningu

Það fauk heldur betur í kvikmyndastjörnuna Tom Cruise í gærkvöldi þegar hann fékk kalda vatnsgusu í andlitið á frumsýningu nýjustu myndar sinnar í London. Maður með hljóðnema smyglaði sér inn í hóp fréttamanna þar sem Cruise gaf sér tíma fyrir viðtöl í tilefni dagsins og notaði svo tækifærið til að gusa vatni framan í leikarann sem brá heldur betur í brún og virtist ekki trúa eigin augum. Í kjölfarið hrópaði Cruise hvað eftir annað að manninum að hann væri fífl og dóni. Þegar hann hafði hellt úr skálum reiði sinnar yfir ódæðismanninn var sá fluttur á brott af lögreglu ásamt þrem myndatökumönnum sem voru með honum í för.