Skóflustunga að nýrri álmu við ME

Fyrsta skóflustunga að nýrri álmu við Menntaskólann á Egilsstöðum var tekin í dag. Hún mun bylta starfi skólans og stórbæta aðstöðu þar. Nýja húsið sem byggja á verður ríflega þúsund fermetrar að stærð og mun gjörbylta aðstöðu kennara sem fram til þessa hafa ekki haft viðunandi vinnurými. Það voru þær Þorgerður Katrín Gunnarsdóttir menntamálaráðherra og Soffía Lárusdóttir, forseti bæjarstjórnar Fljótsdalshéraðs, sem tóku fyrstu skóflustunguna í dag en húsið á að vera fullbyggt haustið 2006. Ríkið greiðir sextíu prósent kostnaðarins en sveitarsjóður fjörutíu prósent. Þegar byggingu verður lokið verður margt breytt frá því að Vilhjálmur Einarsson, fyrrverandi skólameistari ME, hóf kennslu við skólann. Hann segist minnast þess þegar fyrstu nemendurnir hófu nám við skólann árið 1979 að þá var nýbúið að setja fúa á flísarnar í forstofunni og því þurfti sérstaka palla til að ganga úr anddyrinu og inn að heimavistinni. Þá var gripið til þess ráðs að gera kvennaklósettin að eldhúsi og forstofuna að borðstofu. Og þannig var það í tíu ár. Hægt og rólega hefur þetta breyst en frá næsta hausti verður rýmra og heildarstærð skólans nærri sex þúsund fermetrar.