Skipuleggjendur kölluðu á lögreglu

Mótmæli sem náttúruverndarsamtökin Náttúruvaktin stóðu fyrir fyrir utan Nordica hótel í gær vöktu litla hrifningu skipuleggjenda alþjóðlegrar álráðstefnu sem þar fer fram. Fór nærvera um tíu mótmælenda svo mjög fyrir brjóstið á þeim að þess var krafist að lögregla yrði kölluð til. Voru samtökin að mótmæla því að slík ráðstefna væri haldin hér á landi svo lítið beri á en þátttakendur á henni skipta tugum og eru allir helstu álframleiðendur heims með fulltrúa á staðnum. Er ætlunin að samræma framtíðarstefnu iðnaðarsins næstu ár og áratugi og voru mótmælendur mótfallnir því að Ísland væri í forgrunni slíkra hugmynda. Ennfremur er gagnrýnt að íslensk orkufyrirtæki á borð við Landsvirkjun og Orkuveitu Reykjavíkur skyldu styrkja slíka ráðstefnu og voru meðal annars Rannveigu Rist, forstjóra Alcan í Straumsvík, formlega afhent mótmæli hópsins. Ráðstefnunni verður framhaldið í dag en í morgun heldur hópurinn austur á land og er ætlunin að skoða þar Kárahnjúkavirkjun.