Rannsókn sé stórpólitísk tíðindi

Stjórnarandstaðan kallar það stórpólitísk tíðindi að Ríkisendurskoðandi dragi í efa hæfi forsætisráðherra þegar tekin var ákvörðun um sölu ríkisbankanna. Formaður Vinstri - grænna segir að það yrði ekki einungis áfellisdómur yfir forsætisráðherra, yrði hann talinn vanhæfur, heldur einnig yfir fyrri störf Ríkisendurskoðunar. Forystumenn stjórnarandstöðuflokkanna funduðu í dag um þá stöðu sem upp er komin í málinu eftir að ríkisendurskoðandi ákvað að skoða mögulegt vanhæfi Halldórs Ásgrímssonar forsætisráðherra. Steingrímur J. Sigfússon, formaður Vinstri - grænna, segir það stórmál að sjálfur forsætisráðherra hafi hugsanlega ekki verið hæfur til að fjalla um sölu bankanna í ráðherranefnd um einkavæðingu. Þá er það einnig mat Steingríms að Ríkisendurskoðun sé komin í vægast sagt óþægilega stöðu í málinu. Hann segir stofnunina meira og minna farna að endurskoða eigin verk og fyrri niðurstöður. Ríkisendurskoðun hafi skilað frá sér að minnsta kosti í tvígang skýrslum og svo álitsgerðum eða minnisblöðum og mætt fyrir þingnefndir þar sem hún hafi talið þessi mál upplýst. „Það mun vera svo seint sem á fundi fjárlaganefndar á miðvikudaginn sem Ríkisendurskoðun taldi ekki ástæðu til þess að kanna frekar m.a. þennan þátt um mögulegt vanhæfi forsætisráðherra,“ segir Steingrímur. Aðspurður hvort hann telji Ríkisendurskoðun vanhæfa til þess að halda áfram með málið neitar Steingrímur því en segist fyrst og fremst að benda á staðan hljóti að teljast erfið fyrir ríkisendurskoðanda. „Segjum nú að hann kæmist að alveg nýrri og óvæntri niðurstöðu sem væri þvert á fyrri niðurstöður og fyrri skýrslur. Þá er væri verið að fella áfellisdóm yfir þeim verkum,“ segir Steingrímur. Því verður að mati Steingríms og annarra forystumanna í stjórnarandstöðuflokkunum að fara fram óháð rannsókn á málinu í eitt skipti fyrir öll. „Og alveg sérstaklega ættu auðvitað forkólfar ríkisstjórnarinnar, ráðherrar í nefnd um einkavæðingu og þeir sem eiga beina aðild að þessu máli, að fara fram á slíky,“ segir Steingrímur. Steingrímur telur að réttast sé að láta niðurstöðu Ríkisendurskoðunar verða næsta skref í málinu en leggur áherslu á það snúist um miklu meira en bara persónuleg tengsl Halldórs Ásgrímssonar. Hann segir margt fleira óupplýst í málinu sem snúi að stjórnarflokkunum báðum. Þess vegna geti niðurstaða Ríkisendurskoðunar varðandi hugsanlegt vanhæfi forsætisráðherra aldrei orðið neinn endapunktur í málinu. Málið eigi rætur mun víðar og og pólitískir og siðferðilegir þættir þess teygi sig víða.