Færri í nám en vilja

Um sjötíu prósent fleiri óska þess að hefja nám við Háskólann í Reykjavík nú en óskuðu eftir skólavist í fyrra í skólana tvo, sem hafa sameinast í Háskólanum í Reykjavík, það er HR og Tækniháskóla Íslands. Alls hafa 1.700 sótt um nú og munu 950 þeirra komast að.  "Í fyrsta lagi kallar atvinnulífið eftir fleira háskólamenntuðu fólki, bæði í hefðbundnum greinum og á nýjum sviðum. Það er fjöldi tækifæra fyrir fólk með háskólamenntun. Í öðru lagi eykst eftirspurn með auknu framboði á háskólanámi, nýjum háskólum, nýjum námsbrautum, meiri fjölbreytni í meistaranámi og nýjum tækifærum til að stunda háskólanám með vinnu," segir Guðfinna S. Bjarnadóttir, rektor Háskólans í Reykjavík, um ástæður þess hversu margir sækja um nú. Boðið verður upp á tíu nýjar námsbrautir á næsta skólaári og er aðsóknin í þær mikil. Sem dæmi um það hafa 750 sótt um í nýja tækni- og verkfræðideild skólans. "Í grófum dráttum hefur fjöldi umsókna tvöfaldast á milli ára. Um fjögur hundruð sóttu um í Bifröst og  munum við taka inn um 135 nemendur," segir Runólfur Ágústsson, rektor Viðskiptaháskólans á Bifröst. Runólfur segir að Viðskiptaháskólinn auki námsframboð og eins sé mikil sókn í meistaranámið í skólanum. "Ég held að við séum að ná í gegn með okkar sérstöðu. Við erum lítill skóli með fáa nemendur sem við veitum góða þjónustu og mikil gæði í kennslu. Við erum ekki í svokölluðu massanámi, þar sem menn hrúga miklu fólki inn í fyrirlestrarsali og troða hlutunum ofan í það, heldur er námið mestmegnis byggt á verkefnum og umræðum. Vörumerkið Bifröst er að ná í gegn hjá fólki," segir Runólfur.