Handtöku Mladic að vænta

Ríkisstjórn Serbíu veit um felustað Ratkos Mladic, stríðsglæpamanns og yfirmanns hers Bosníu-Serba í borgarastríðinu fyrir áratug. Handtöku er að vænta, samkvæmt fréttum serbneskra fjölmiðla. Þrýstingur á stjórnvöld í Serbíu og Bosníu hefur verið stóraukinn í von um að þau afhendi stríðsglæpamenn. Snaran um hálsinn á Radko Mladic þrengist, segir í fyrirsögn fréttatímaritsins NIN í Serbíu. Á næstunni verður gerð gangskör að því að hafa uppi á og handtaka Mladic sem ber ásamt öðrum meginábyrgð á fjöldamorðunum í Srebrenica árið 1995. Yfirvöld vita hvar hann heldur til, í einni af stærri borgum Serbíu. Aðaláherslan er lögð á að gera það án blóðsúthellinga, samkvæmt fréttum dagblaðsins Danas í Serbíu. Í frétt blaðsins segir að sögusagnir um að Mladic ætli að gefa sig fram séu hins vegar úr lausu lofti gripnar. Hingað til hafa ráðamenn í Serbíu, umbótasinnar jafnt sem þjóðernissinnar, ekki séð sér hag í að hafa upp á Mladic sem talið hefur verið víst að héldi til í Serbíu. Til að mynda hefur hann fengið atvinnuleysisbætur og aðrar bætur í Belgrad, en ættingjar hafa mætt til að taka á móti tékkanum. NATO og Evrópusambandið hafa undanfarið stóraukið pólitískan þrýsting á stjórnvöld í Serbíu og Bosníu að sjá til þess að stríðsglæpamenn verði handteknir og færðir Stríðsglæpadómstólnum í Haag og virðist nú sem sá þrýstingur skili árangri. Í Bosníu hefur verið leitað að Radovan Karadzic og er talið að hans bíði sömu örlög og Mladic, þ.e. að stjórnvöld sjái sér ekki lengur hag í að halda yfir honum hlífiskildi heldur verði hann handtekinn og framseldur.