Íhuga að stofna nýjan barnaskóla

Óánægðir kennarar við Landakotsskóla íhuga ásamt foreldrum að setja á fót nýjan barnaskóla þar sem séra Hjalti Þorkelsson yrði skólastjóri. Átta kennarar af fimmtán í Landakotsskóla krefjast þess að stjórn skólans segi af sér. Fjölmennur fundur kennara, foreldra, og stjórnenda Landakotskóla var haldinn í gærkvöldi, en hann var lokaður fjölmiðlum. Kennarar sendu frá sér yfirlýsingu að fundinum loknum þar sem þess var krafist að stjórn skólans segði af sér þar sem hún vildi ekki veita skólastjóra það vald sem honum bæri að hafa samkvæmt grunnskólalögum. Meira en helmingur kennara við Landakotsskóla, eða 8 af 15, ritaði undir yfirlýsinguna. Gríðarleg ólga hefur ríkt í skólanum undanfarnar vikur eftir að séra Hjalti Þorkelsson skólastjóri sagði starfi sínu lausu í kjölfar þess að Bessí Jóhannsdóttur aðstoðarskólastjóra var vikið fyrirvaralaust úr starfi. Á fundinum í gær var lýst yfir áhyggjum af ástandinu og sögðu foreldrar sem fréttastofa Bylgjunnar hefur rætt við að fátt hefði verið um svör hjá stjórn skólans þegar hún hefði verið spurð um hugmyndir til lausnar deilunni. Samkvæmt heimildum fréttastofu íhugar hópur óánægðra kennara og foreldra við skólann að setja á fót nýjan barnaskóla og er verið að setja saman undirbúningshóp til að vinna að verkefninu. Hópurinn sættir sig ekki við stöðuna eins og hún er nú í Landakotsskóla og hefur fréttastofan enn fremur heimildir fyrir því að að óbreyttu ætli stór hópur nemenda að hætta í skólanum. Svo mikil óánægja er með aðgerðir stjórnar skólans að undanförnu að kennarar og foreldrar telja að með þeim sé verið að eyðileggja skólastarfið. Mikill einhugur er sagður innan raða foreldra með að stofna nýjan skóla ef núverandi stjórn Landakotsskóla lýsir sig ekki reiðubúna að gefa eftir í þeim tilgangi að reyna að leysa deiluna á farsælan hátt.