Kalt í Evrópu

Þótt júní sé genginn í garð þá er kalt í Evrópu. Þegar íbúar í austurrísku Ölpunum vöknuðu í gærmorgun blasti við þeim fjörtíu sentímetra jafnfallinn snjór. Í landbúnaðarhéruðum nærri Verónu í norðaustanverðri Ítalíu varð skyndilegur uppskerubrestur þegar þriðjungur ferskja og epla urðu kuldabola að bráð. Í Króatíu sem er vinsæl sumarleyfisparadís skörtuðu fjallatopparnir hvítum kollum og hitinn fór niður í þrjár gráður. Skotar fóru heldur ekki varhluta af kuldanum og fór hiti þar víða niður fyrir frostmark í gær. Breski flugherinn mældi lægsta hita í júní síðan mælingar hófust í Oxfordskíri en þar mældist hitinn einungis 0,3 gráður.