Krabbameinssjúklingar selja lyfin

Algengt er að fíklar útivegi sér morfín og önnur ávanabindandi efni með því að falsa lyfseðla, að sögn Matthíasar Halldórssonar aðstoðarlandlæknis. Hann segir líklegt að fjöldi lyfseðla af því tagi hlaupi á tugum það sem af er þessu ári, en kveðst ekki hafa nákvæma tölu yfir þá. Slíkt athæfi verði lögreglumál. "Þessi lyf sem um ræðir komast með ýmsu móti á svokallaðan fíkniefnamarkað," sagði Matthías. "Embættinu hafa til dæmis borist ábendingar um verkjasjúklinga og fyrrum krabbameinssjúklinga sem eru sagðir halda áfram að fá sterk verkjalyf hjá lækni sínum eftir að þeim er batnað en selja þau síðan og þá með góðum hagnaði. Það getur verið óskaplega erfitt fyrir lækna að neita fólki sem segist vera með mikla verki. Þá leita fíklar allra leiða til að ná sér í efni. Þess eru meira að segja dæmi að leitað hafi verið til landlæknisembættisins eftir uppáskrift til að reyna að næla sér í verkjalyf." Matthías sagði að landlæknisembættið hefði svipt einn lækni leyfi til að skrifa út tiltekin verkjalyf það sem af væri þessu ári. Ef embættið hefði sannanir fyrir því að læknar misnotuðu aðstöðu sína með þeim hætti, þá hikaði það ekki við að beita slíkum úrræðum.