Á hlaupahjólum yfir hálendið

Tólf daga ferð tveggja Hollendinga yfir hálendið á sérútbúnum hlaupahjólum er nýlokið. Ferðina fóru þeir til styrktar langveikum börnum í Hollandi. Þetta er í annað skipti sem Hollendingarnir tveir safna fyrir langveik börn. Þeir fóru á línuskautum hringinn í kringum landið árið 2001 fyrir börn með vöðvahrörnunarsjúkdóm en nú söfnuðu þeir fyrir þá sem eru með slímseigjusjúkdóm. En þeir ætla ekki að láta hér við sitja heldur munu þeir fara í enn eina ferðina næsta sumar en þá verður farið frá Snæfellsnesi yfir á Austfirði á einhvers konar seglbílum. En hvernig gekk ferðin sem þeir voru að ljúka, frá Svínavatni í Hrútafirði og yfir hálendið að Hellu. Joeri Rooij, annar hlaupahjólakappanna, segir að hún hafi verið mun erfiðari en þeir hafi búist við, sérstaklega á Kili og við Hveravelli. Snjórinn hafi verið mikill en þeim hafi þó tekist ætlunarverk sitt. Já, ferðin var víst heldur erfiðari en þeir bjuggust við og lá við að þeir gæfust upp á svæðinu sunnan Hofsjökuls sem var mjög erfitt yfirferðar. Þeim innan handar við skipulagningu ferðarinnar voru Highlander-ævintýraferðir en íslenskir styrktaraðilar voru Icelandair og Össur. En hvað varð til þess að þeir völdu Ísland? Jesaja Bouman, hinn hlaupahjólakappinn, segir að Ísland hafi orðið fyrir valinu vegna þess að það er eyja. Þeir hafi skoðað eyjar á kortum, þar á meðal Jamaíku en þar hafi engir bakhjarlar fengist. Þá hafi Rooij dottið Ísland í hug og á þá hugmynd hafi þeir fallist.