Versta sumarbyrjun í 25 ár

Langþráð rigning féll til jarðar á Suður- og Vesturlandi í dag, bændum til mikillar ánægju enda gróður víða illa farinn vegna þurrka. Ólafur Dýrmundsson hjá Bændasamtökunum telur þessa sumarbyrjun þá verstu í um aldarfjórðung. Það ringdi í höfuðborginni í dag sem og víða annars staðar. Bændur og ræktendur fögnuðu rigningunni enda hafa þurrkar seinkað vorkomunni. Spretta hefur verið slæm í úthögum svo og túnum og ekki hefur verið hægt að hefja skórækt. Á Norðausturlandi hafa bændur þurft að kaupa hey handa búfenaði bæði vegna þurrka núna og á síðasta ári. Nægt hey hefur þó verið til annars staðar og því ekki verið skortur. Ólafur Dýrmundsson, ráðunautur um lífrænan búskap og landnýtingu hjá Bændasamtökunum, segir þessa byrjun sumarsins vera með eindæmum slæma og þetta sé að verða með erfiðari vorum. „Þetta leit mjög vel út. Það var prýðilegt veður t.d. í aprílmánuði og virtist ætla að vora snemma en síðan datt botninn úr vorinu,“ segir Ólafur. Ólafur telur gróðurinn geta tekið vel við sér ef það rignir hressilega á næstunni. Þó er ljóst að það verður ekki metspretta þetta árið eins og síðustu tvö sumur. Ólafur segir tímann í byrjun sumars þann viðkvæmasta og hann sé erfiður fyrir bændur þar sem þeir losni ekki við fé úthaga og þurfi því að gefa því lengur, en það sé mikil vinna. Hjá skógræktarfólki sé erfitt að geta ekki plantað út nú og þá sé hætta á því að töluvert af kornökrum séu ónýtir í ár, en þar sé sáð snemma á vorin.