Hungursneyð yfirvofandi í N-Kóreu

Stjórnvöld í Norður-Kóreu hafa stefnt milljónum manna úr borgum landsins út í sveitir til þess að vinna á bóndabæjum. Mikil hungursneyð er yfirvofandi í landinu. Norður-Kórea hefur um árabil þurft að treysta á erlenda aðstoð við að brauðfæða þegna sína. Ástandið var sérstaklega slæmt um miðjan níunda áratuginn og þá er talið að um ein milljón manna hafi dáið úr hungri. Yfirvöld kölluðu það „Þrautagönguna“. Ástæðurnar fyrir þessu mikla útkalli á vinnuafli út í sveitirnar eru meðal annars þær að tíðarfarið hefur ekki verið gott og eldsneytisskortur er svo mikill að ekki er hægt að halda traktorum og öðrum landbúnaðarvélum gangandi. Þar á handaflið að koma í staðinn. Það er ekki óalgengt í þessu miðstýrða landi að fólk sé kallað út í einhverskonar átak en þetta er umfangsmesta útkall sem menn muna. Vestrænn kaupsýslumaður sem heimsækir landið reglulega segir að vinir hans hafi tjáð honum að verið væri að reyna að forðast nýja þrautagöngu. Kaupsýslumaðurinn sagði að það væri tómlegt um að litast í höfuðborginni, Pjongjang, þar sem svo margir íbúanna væru úti í sveit. Þeir sem eftir væru ynnu á tvöföldum vöktum.