Khodorkovsky í níu ára fangelsi

Rússneski auðjöfurinn Mikhail Khodorkovsky, eigandi Yukos-olíurisans, var dæmdur í níu ára fangelsi fyrir stundu. Málaferlin virðast því loks vera að taka enda eftir sífelldar frestanir. Samstarfsmaður hans, Platon Lebedev, fékk sama dóm. Khodorkovsky og Lebedev voru meðal annars sakaðir um þjófnað, fjárdrátt og skattsvik. Réttarhöldin yfir þeim hafa þótt minna um margt á aðfarir gömlu sovésku kommúnistastjórnanna, enda virðist liggja nokkuð ljóst fyrir að með þessum málarekstri sé Pútín Rússlandsforseti að losa sig við óþægilegan keppinaut.