Stórslysi forðað fyrir tveim árum

Litlu munaði að stórslys yrði þegar tvær erlendar flugvélar stefndu hvor á aðra í sömu flughæð vestur af landinu, en íslenskur flugumferðarstjóri kom til bjargar. Atvikið átti sér stað 1. ágúst árið 2003. Vélarnar voru fjögurra hreyfla þota frá færeyska flugfélaginu Atlantic Airways og Piper-einkaflugvél. Litla vélin var á leið frá Narsassuaq á Grænlandi til Reykjavíkur en þotan frá Reykjavík til Narsassuaq. Piper-vélin var í 23 þúsund feta hæð en þotan þúsund fetum ofar en hafði verið beðin um að lækka sig í 22 þúsund fet. Flugmaðurinn stimplaði hins vegar inn tuttugu og þrjú þúsund fet, eða sömu hæð og Piper-vélin var í. Samkvæmt niðurstöðum Rannsóknarnefndar flugslysa, sem rannsakaði atvikið, fóru flugmenn Atlantic Airways ekki eftir verklagsreglum og voru mistökin ekki leiðrétt fyrr en íslenskur flugumferðarstjóri gerði sér grein fyrir þeim og gaf fyrirmæli um tafarlausa leiðréttingu.