Banaslysum barna fækkar

Dauðsföllum barna í umferðarslysum hefur fækkað stórlega á síðustu árum að sögn Sigurðar Helgasonar, verkefnisstjóra hjá Umferðarstofu. Á blaðamannafundi sem Umferðarstofa, Lýðheilsustöð og Slysavarnarfélagið Landsbjörg héldu í gær voru kynntar niðurstöður könnunar um öryggi barna í bílum. Á fundinum kom meðal annars fram að ekkert barn hefur látist í umferðarslysi á síðustu þremur árum. Í könnuninni kemur fram að á síðustu tíu árum hafi tólf börn látist í umferðarslysum þar af níu á árunum 1995 til 1999. Aðeins eitt barn af þessum tólf notaði réttan öryggis- og verndarbúnað. Tæplega fjörutíu börn sex ára og yngri slasast árlega sem farþegar í bíl. Á fundinum var fullyrt að mun færri börn myndu slasast ef foreldrar og forráðamenn barna notuðu réttan öryggis- og verndarbúnað. Þá er átt við barnastóla og öryggisbelti. Öryggisbelti ein og sér teljast ófullnægjandi öryggisbúnaður fyrir börn sex ára og yngri. Samkvæmt könnuninni hefur notkun á réttum búnaði stóraukist. Alls nota 84 prósent foreldra réttan öryggisbúnað fyrir börn sín, eitt af hverjum tíu notar óviðunandi öryggisbúnað en eitt af hverjum tuttugu notar engan öryggisbúnað fyrir börnin.