Lúðvík víttur í þinginu

Halldór Blöndal, forseti Alþingis, vítti Lúðvík Bergvinsson, þingmann Samfylkingar, í umræðum um störf þingsins fyrir stundu. Lúðvík fór í ræðustól í upphafi þingfundar til að tala um störf þingsins og krefjast skýringa á því hvers vegna ekki fengist utandagskrárumræða um störf einkavæðingarnefndar. Halldór svaraði honum úr forsetastóli og sló í bjölluna en þá vændi Lúðvík Halldór um ritskoðun, sagði hann berja sífellt í bjölluna á meðan þingmenn hefðu orðið og eðlileg umræða gæti ekki farið fram vegna hávaða í forseta. Halldór rak Lúðvík úr ræðustóli í kjölfarið og sagði að orð hans, „Forseti, ég hef orðið“, væru vítaverð. Þar með hafði forseti beitt 89. grein þingskaparlaga um þingvíti en þar segir: „Ef þingmaður talar óvirðulega um forseta Íslands eða ber þingið eða ráðherra eða einhvern þingmann brigslyrðum eða víkur með öllu frá umtalsefninu skal forseti kalla til hans: „Þetta er vítavert,“ og nefna þau ummæli sem hann vítir. Nú er þingmaður víttur tvisvar á sama fundi og má þá forseti, með samþykki fundarins, svipta þingmanninn málfrelsi á þeim fundi. Þetta er í annað sinn sem Halldór vítir Lúðvík fyrir ummæli í garð forseta Alþingis, auk þess sem Halldór vítti Ögmund Jónasson, þingmann Vinstri grænna, árið 2002 fyrir svipaðar sakir. Þá hafði enginn þingmaður verið víttur síðan árið 1957.