Forsætisráðherra með ráðherraræði

Einkavæðingarnefnd taldi ekki þjóna neinum tilgangi að hitta efnahags- og viðskiptanefnd vegna sölu Landsímans. Þingnefndinni var bent á að skrifa nefndinni bréf ef hún hefði einhverjar spurningar. Þingmenn stjórnarandstöðunnar sökuðu forsætisráðherra um ráðherraræði í þinginu í dag. Ögmundur Jónasson, þingmaður vinstri grænna, sagði skilaboðin sem einkavæðinganefnd hafi sent efnahags- og viðskiptanefnd fáheyrðan atburð og með því hafi fyrrnefnda nefndin gefið Alþingi langt nef. Og hann spurði Halldór Ásgrímsson forsætisráðherra hvort þetta hafi verið gert eftir hans skipun eða með hans vitneskju. Forsætisráðherra sagðist hafa frétt af málinu í hádeginu.  Einkavæðinganefnd ynni að tillögugerð ásamt fyrirtækinu Morgan Stanley og ríkisstjórninni hefði ekki verið gerð grein fyrir stöðunni. Eftir það yrði greint fá málinu opinberlega. Ekki fyrr. Jón Bjarnason, þingmaður vinstri grænna, sagði að verið væri að traðka á eðlilegum störfum og rétti þingsins til þess að koma að málum. Hann sagði ríkisstjórnina ætla að fara þvert á vilja þjóðarinnar í að því að selja Símann. Kristján Möller, þingmaður Samfylkingar, sakaði forsætisráðherra um að hafa farið með rangt mál þegar hann sagði að sérfræðingar hefðu almennt ekki mælt með því að grunnnetið yrði skilið frá Landssímanum áður en hann yrði seldur. Sérfræðingar Samkeppnisstofnunar hefðu gert alvarlegar athugasemdir við að Landssíminn yrði seldur án þess að grunnetið yrði aðskilið frá fyrirtækinu eða þá að breiðbandið yrði selt. Forsætisráðherra sagðist ekki hafa vitað um skýrslu Samkeppnisstofnunar fyrr en fyrir nokkrum dögum. Hann sagði hana algerlega úrelta því hún væri gerð áður en fjarskiptalögum var breytt og ákvörðun hafi verið tekin um sölu Símans. Halldór spurði svo hvers vegna Kristján vitnaði ekkert í forstjóra póst- og fjarskiptastofnunar, helsta sérfræðinginn í þessum málum, sem komið hafi á fund efnahags- og viðskiptanefndar fyrr um morguninn. „Mér er sagt að hann hafi verið með sérfræðiálit sem hentaði ekki stjórnarandstöðunni,“ sagði forsætisráðherra á þinginu í dag.