Opinberrar rannsóknar krafist

Þingmenn úr nær öllum flokkum sem eiga sæti á færeyska lögþinginu hafa krafist þess að opinber, óháð nefnd rannsaki hvað fór úrskeiðis þegar flutningaskipið Jökulfell sökk út af Færeyjum 7. febrúar síðastliðinn. Fjórir eistneskir sjómenn fórust með skipinu. Fram kom í Útvarp Føroya í gær að rúmir tveir klukkutímar liðu frá því að neyðarkall barst frá skipverjum þangað til að björgunarþyrla var send á vettvang. Bjørn Kalsø, ráðherra í færeysku landsstjórninni, sagði við umræður á lögþinginu að Færeyska sjóbjörgunarsveitin hefði talið rétt að bíða þar sem fyrstu upplýsingar um slysið voru óljósar. "Ef eitthvað hefur misfarist þá fögnum við því að það verði rannsakað og vonum að lærdómur verði dreginn af því, ekki aðeins út af þessu slysi heldur allra vegna, alltaf," segir Knútur G. Hauksson, forstjóri Samskipa sem var með Jökulfellið á leigu. Hann býst síður við að fyrirtækið bregðist sérstaklega við þessum tíðindum.