Tepptu umferð vegna deilna

Ökumaður fólksbíls og vagnstjóri tepptu umferð um götu í Kópavogi í gær í næstum því stundarfjórðung þar sem hvorugur vildi víkja fyrir hinum. Atvikið er í skoðun hjá Strætó. Stöð 2 fékk ljósmyndir hjá manni sem varð vitni að því þegar bílstjóri fólksbíls og strætisvagns mættust þar sem gatan er þrengd til að draga úr umferðarhraða. Á myndbandi sem maðurinn náði sjást ökumaðurinn og bílstjórinn þrefa og blót hvor öðrum. Hvorugur vildi víkja og stóðu þeir í stappinu í heilar 13 mínútur og var farþegi í vagninum allan tímann. Strætó mun fara yfir þessar myndir og greina atvikið með vagnstjóranum, en Hörður Gíslason, aðstoðarframkvæmdastjóri Strætós, segir að almennt mælist þjónustan hjá vagnstjórunum vel fyrir. Hann segir vagnstjóra meðvitaða um að sýna tillitssemi og lipurð í umferðinni. Það liggi fyrir að það fái þeir til baka í þeirri fyrirgreiðslu sem þeir fái í umferðinni. Þarna sé um að ræða tilvik sem stjórnendur Strætós muni skoða en það sé vinnulag hjá Strætó að greina atburði eins og þennan og læra af þeim. Þættir sem skoða verður þegar atvikið er greint er hvort óbilgirni vagnstjórans hafi verið réttlætanleg, hvort hann hefði átt að taka farþega upp í vagninn, sem vakti athygli á sér án árangurs, hvort hagsmunir farþegans í vagninum hafi verið fyrir borð bornir og sömuleiðis annarra vegfarenda. Þó verður að muna að sjaldan veldur einn þá tveir deila.