Landsbyggðarfólk nýtur verðstríðs

Íbúar landsbyggðarinnar njóta góðs af verðstríðinu sem nú geisar milli lágvöruverslana á höfuðborgarsvæðinu, jafnvel þótt þar sé oft bara ein stórverslun. Verslanakeðja Krónunnar hefur lýst yfir verðstríði á markaðnum á höfuðborgarsvæðinu og lækkað verð á fjölda vörutegunda. Krónan er hins vegar ekki með jafn margar verslanir og Bónus og ekki eins víða um landið. Bónus er til dæmis með verslanir á Ísafirði, Akureyri, Egilsstöðum og í Stykkishólmi en Krónan er ekki með verslun á neinum þessara staða. Nettó er hins vegar með verslun á Akureyri og Krónan stefnir að því að opna verslun á Reyðarfirði fyrir páska. Að sögn Sigurðar Gunnarssonar, verslunarstjóra Bónuss á Egilsstöðum, er verð í öllum Bónusverslunum landsins hið sama svo þegar verð er lækkað í Reykjavík þá lækkar það að sama skapi á landsbyggðinni. Íbúar landsbyggðarinnar ættu því að njóta góðs af verðstríðinu á höfuðborgarsvæðinu.