Ingibjörg tekur við af Bryndísi

Ingibjörg Sólrún Gísladóttir, varaformaður Samfylkingarinnar, mun taka við þingmennsku af Bryndísi Hlöðversdóttur þegar hún hættir þann 1. ágúst og tekur við embætti forseta lagadeildar Viðskiptaháskólans á Bifröst. Ákvörðun Bryndísar var kynnt þingflokki Samfylkingarinnar í dag. Bryndís sagði í samtali við fréttastofu að hún vildi nú sinna því fagi sem hún menntaði sig til eftir að hafa setið á þingi í áratug. Ingibjörg segir að afsögn Bryndísar tengist ekki átökum um formannsembættið í Samfylkingunni á nokkurn hátt. Hún sjái mikið eftir Bryndísi sem hafi verið mikil kjölfesta í þingflokknum. Það hafi verið notað sem rök gegn framboði hennar að hún gegni ekki þingmennsku en þeir sem hefðu talað þannig gætu hætt því nú. Formannskjör fer fram í maí.