Gagnrýnir ný tollalög

Ný tollalög sem fjármálaráðherra mælir fyrir á Alþingi á morgun einkennast um of af þeirri oftrú á refsingum sem tröllríður samfélaginu. Þetta segir Pétur Blöndal, þingmaður Sjálfstæðisflokksins. Afleiðingarnar bitni á almennu starfsfólki sem megi refsa fyrir gáleysi eða mistök í starfi verði frumvarpið að lögum. Fjármálaráðherra mælir fyrir nýju frumvarpi um tollalög í þinginu á morgun. Flokksbróðir hans, Pétur Blöndal, segir frumvarpið um margt ágætt en það beri þó þann skugga á að verið sé að smygla inn smásmugulegum refsiákvæðum. Hann ásamt nokkrum þingmönnum hafi haft áhyggjur af því hversu lagt sé gengið að refsa venjulegu starfsfólki sem vinni sín störf, þó sérstaklega vegna vítaverðs gáleysis. Það sé fráleitt að maður sem geri mistök og taki t.d. ranga vöru úr hillu get átt það á hættu að lenda í fangelsi. Aðspurður hvort hann telji að flokksbróðir hans, Geir H. Haarde fjármálaráðherra, sé svo refsiglaður segir Pétur að svo sé ekki heldur sé þetta afstaða þeirra sem samið hafi frumvarpið. Það hafi embættismenn gert sem sjái jafnvel um að framfylgja lögunum. Þeir fáist oft við þá sem fara í kringum lögin og brjóti þau, eðli málsins samkvæmt, og vilji þess vegna hafa góð lög í höndunum til að berja á þeim. Pétur segir ankannalegt þegar kerfið gangi út frá því að allir séu glæpamenn. Menn eigi ekki að brjóta lög en það megi aldrei verða reglan að refsa fyrir gáleysi. Samkvæmt lögunum megi refsa tollmiðlurum ef þeir lesi rangt af tollnúmeri eða fari línuvillt í einhverjum skrám. Þetta geti valdið því að vara fari inn í landið án þess að af henni séu greiddir tollar. Pétur segir enn fremur að menn þurfi alltaf reikna með að fólk geri mistök í lífinu og hafa þurfi sveigjanleika í kerfinu fyrir slík mistök.