Tífalt fleiri í offitumeðferð

Undanfarin tvö ár hafa tífalt fleiri sóst eftir meðferð vegna offitu á Reykjalundi en gert er ráð fyrir að stofnunin geti tekið við. Til að bregðast við hefur Reykjalundur tekið við meira en helmingi fleiri en samningur við ríkið kveður á um. Tíðni offiitu hefur aukist mikið hér á landi á undanförnunm árum. Að sama skapi hefur skurðaðgerðum sem miða að því að hjálpa offitusjúklingum fjölgað til muna. Enginn fer í slíka aðgerð nema hann hafi farið í meðferð á Reykjalundi fyrst. Nokkur hluti þeirra sem þangað leita þarf síðan ekki á aðgerð að halda eftir meðferðina. Hjördís Jónsdóttir, lækningafostjóri á Reykjalundi, segir að á síðasta ári hafi 240 manns falast eftir meðferð á Reykjalundi vegna offitu. Árið 2003 bárust Reykjalundi 340 beiðnir vegna slíkra meðferða. Nú eru um það bil 350 á biðlista hjá Reykjalundi vegna þessa. Að sögn Hjördísar kveður samningur Reykjalundar við hið opinbera á um að stofnunin skuli taka við 25 manns vegna offituvandamála á ári hverju. Starfsmenn Reykjalundar hafa hins vegar lagt hart að sér og vegna mikillar eftirspurnar hefur tekist að veita um 60 manns meðferð undanfarin tvö ár. Nú er hins vegar í bígerð samningur við heilbrigðisráðuneytið fyrir árin 2006 til 2008 og er gert ráð fyrir því að í lok árs 2008 geti Reykjalundur tekið við um hundrað manns á ári vegna offituvanda. Í heilbrigðisáætlun hins opinbera frá árinu 2000, sem gildir til ársins 2010, er nær ekkert minnst á offitu og er hún ekki skilgreind sem forgangsverkefni hjá heilbrigðisyfirvöldum fram til þess tíma.