Fjölmenn kaupstefna í Reykjavík

Mid-Atlantic ferðakaupstefnan, sem haldin er á vegum Icelandair, hefst í kvöld. Kaupstefnan, sem stendur til 6. febrúar, er árlegur viðburður í ferðaþjónustu og er ætluð til að tengja kaupendur og seljendur í Ameríkur og Evrópu. Aldrei hefur jafnmikill fjöldi sótt kaupstefnuna og í ár en búist er við 500 gestum frá 17 löndum. Þátttakendur eru flestir fulltrúar ferðaskrifstofa, hótela, bílaleiga, skemmtigarða auk annarra fyrirtækja í ferðaþjónustu. Fulltrúar frá San Francisco verða áberandi í ár þar sem bein áætlunarflug milli Íslands og borgarinnar hefst í vor.