Vaxtarsamningur við Vestfirði

Iðnaðarráðherra og sjávarútvegsráðherra undirrituðu samkomulag á Ísafirði í gær um að vinna sameiginlega að því að efla rannsóknir og þróunarstarfsemi í sjávarútvegi. Samkvæmt samkomulaginu munu ráðuneytin vinna að tveimur verkefnum á Ísafirði í ár; annað á sviði veiðarfærarannsókna en hitt varðar þorskeldi í sjókvíum. Ráðuneytin leggja til tíum milljónir króna hvort vegna verkefnanna. Við sama tækifæri voru kynntar niðurstöður skýrslu Verkefnisstjórnar um byggðaáætlun Vestfjarða. Þar kemur fram að Vestfirðir eigi mikla möguleika til vaxtar og þróunar á næstu árum og búist er við að íbúum á svæðinu muni fjölga um hálft prósent á árið næstu fimmtán ár. Í skýrslunni er lögð áhersla á að efla Ísafjörð sem byggðarkjarna Vestfjarða og einnig verður gerður þriggja ára Vaxtarsamningur sem miðast við að styrkja hagvöxt einstakra svæða á Vestfjörðum. Tillögurnar taka mið af sambærilegum áherslum víða erlendis þar sem lögð er áhersla á að efla byggðakjarna með markaðstengdum aðgerðum.