Í fararbroddi erfðafræðirannsókna

Vart þarf að kynna fyrir­tækið Íslenska erfðagreiningu, eða de­Code, fyrir Íslendingum. Það hefur nú starfað um allangt skeið undir stjórn Kára Stefánssonar og þótt saga þess hafi ekki alltaf verið dans á rósum þá er óumdeilt að fyrir­tækið er vel þekkt úti í löndum og Ísland er litið öfundaraugum af nágrannaþjóðunum fyrir að hafa tekið forystu meðal Norðurlandanna í erfðafræðirannsóknum.

Starfsemi ÍE felst í að nota niðurstöður erfðarannsókna til að þróa og markaðs­setja lyf við algengum sjúkdómum. Mörg fyrirtæki önnur í heiminum starfa á sama sviði en það sem gerir ÍE að nokkru frábrugðið öðrum slíkum er að þar er litið mest til rannsókna á stórum almennum sjúkdómum eins og til að mynda hjartaáföllum meðan mörg önnur einbeita sér að sjúkdómum sem ekki eru jafn algengir. Vísindamenn ÍE hafa náð að einangra fjölda erfðavísa í þessum tilgangi en sífellt bætist við þekkinguna og á þessari stundu fara fram erfðafræðarannsóknir á um 50 sjúkdómum. Þess utan er unnið að lyfjaþróun í átta verkefnum.