Domingo í skýjunum með tónleika

Á fimmta þúsund manna hlýddu á stórsöngvarana Placido Domingo og Önu Mariu Martinez á tónleikum þeirra í Egilshöll í gærkvöld. Skipuleggjandi tónleikanna segir Domingo hafa verið í skýjunum yfir móttökum Íslendinga. Mikil umferðarteppa varð við Egilshöll í gærkvöld þegar þúsundir manna streymdu þangað til að hlýða á tónleika spænska tenórsins Placidos Domingos og söngkonunnar Önu Mariu Martinez. Þegar verst lét lá bílaröð frá höllinni og niður undir Ártúnsbrekku. Að sögn lögreglu gekk umferðin þó áfallalaust fyrir sig en um stundarfjórðungsseinkun varð á tónleikunum af þessum sökum. Lögreglan segir deginum ljósara að gatnakerfið beri engan veginn umferðarþunga af þessari stærðargráðu. Þorsteinn Kragh, skipuleggjandi tónleikanna, er hins vegar hæstánægður með tónleikana sjálfa. Hann segir að þeir hafi tekist í alla staði frábærlega. Tveir íslenskir söngvarar, Sigrún Hjálmtýsdóttir og Ólafur Kjartan Sigurðarson, komu fram í lok tónleikanna og sungu nokkur lög með Domingo og Martinez og segir Þorsteinn að það hafi verið algjörlega óvænt og óskipulögð uppákoma. Hann hafi verið staddur frammi á gangi þegar tónleikunum lauk og verið var að klappa söngvarana upp þegar hann hafi rétt náð í Diddú sem var á leið annað að syngja. Hann hafi sagt henni hann hefði á tilfinningunni að eitthvað ætti eftir að gerast því Domingo hefði gefið sitthvað í skyn. Stuttu síðar hafi hún svo verið kölluð á svið. Aðspurður hvað stórsöngvarinn hefði sagt sjálfur eftir tónleikana sagði Þorsteinn að Domingo hefði verið í skýjunum og Ana Maria Martinez sömuleiðis. Hann hafi tekið fleiri lög í uppklappinu en hann ætlaði og einhver hefði fleygt því að hann ætlaði aldrei að stoppa því það hefði verið svo gaman hjá honum. Domingo hafi verið mjög ánægður með skipulagið og móttökurnar. Aðspurður hvort Egilshöll henti fyrir tónleika sem þessa segir Þorsteinn að lofthæðin sé 23-24 metrar en hljómburðurinn hafi verið ótrúlega góður. Listamennirnir voru í hádegisverði hjá forseta Íslands og fara af landi brott um klukkan fjögur í dag. Þorsteinn segir Önu Mariu hafa hrifist svo af landinu að hún ætli sér að kaupa land hér á landi. Hún ætli að búa hér og skrifa bók.