Batt, pyntaði og myrti

Ættingjar fórnarlamba raðmorðingjans Dennis Rader sögðu honum til syndanna í réttarsalnum á fimmtudaginn. Dagana áður höfðu þau mátt hlusta á kvalirnar sem ódæðismaðurinn lét ástvini þeirra ganga í gegnum. Með dómnum lýkur einhverju umtalaðasta morðmáli í Bandaríkjunum um árabil en það á sér rúmlega þrjátíu ára sögu. Árið 1974 valdi Rader sín fyrstu fórnarlömb: Otero-hjónin og tvö af börnum þeirra fimm í Sedgwick-sýslu í Kansas, og næstu sautján árin myrti hann sex konur til viðbótar á svæðinu á langdreginn og kvalafullan hátt. Eftir hvert morð skrifaði hann bréf til lögreglu og fjölmiðla þar sem hann lýsti drápinu og aðdraganda þess í smáatriðum. Bréfin undirritaði hann jafnan "BTK" sem stendur fyrir "Bind, Torture, and Kill" eða "binda, pynta og drepa." Síðasta morðið framdi BTK árið 1991 en þá kyrkti hann Dolores Davis, 63 ára, með sokkabuxum og fleygði svo líkinu undir brú þar sem það síðan rotnaði. Hann lagði leið sína nokkrum sinnum á staðinn og tók myndir af líkinu með grímu sem hann hafði búið til. Það var svo í febrúar á þessu ári sem lögregla hafði loks hendur í hári Rader en þá hafði hann nýlega byrjað að senda frá sér BTK-bréf á nýjan leik. Fáa íbúa í Park City, Kansas, grunaði að þessi vingjarnlegi skátaforingi og sóknarnefndarformaður væri í raun kaldrifjaður morðingi. Réttarhöldin yfir Dennis Rader hafa staðið yfir undanfarnar vikur og máttu ættingjar fórnarlambanna hlusta á ótrúlega nákvæmar og yfirvegaðar lýsingar hans á glæpum sínum. Hann kallaði morðin oftast "verkefni" og virtist hann líta á fólkið sem hann myrti sem dýr sem hann hefði "svæft". "Ég vil að hann kveljist jafn mikið og fórnarlömbin," sagði Beverly Flapp, systir Nancy Fox sem BTK banaði árið 1977. "Það á að henda þessum manni ofan í djúpa, dimma holu og leyfa honum að rotna þar." Rader flutti sjálfur stutta en furðulega afsökunarræðu þar sem hann lýsti því sem hann sagðist eiga sameiginlegt með þeim sem hann drap. Greg Waller dómari dæmdi svo hinn sextuga Rader í fjörutíu ára fangelsi án möguleika á reynslulausn. Dauðarefsing hafði ekki verið tekin upp í Kansas þegar morðin voru framin og því kom hún ekki til greina.