Hætt við Dalsbraut

Bæjarráð Akureyrar hefur samþykkt tillögu Kristjáns Þórs Júlíussonar bæjarstjóra þess efnis að hætt verði við lagningu Dalsbrautar, sunnan Þingvallastrætis, en þess í stað verði lagður göngu- og hjólastígur í götustæðið. Jafnframt verði teknar upp viðræður við KA um mögulega stækkun á núverandi íþróttasvæði félagsins og um nýtt svæði í Naustahverfi. Einnig á að kanna til hlítar hvaða möguleikar eru á vegtengingu frá Naustahverfi niður á Drottningarbraut og hefja undirbúning að gerð Miðhúsabrautar og er þá miðað við að legu hennar verði breytt frá núverandi skipulagi þannig að hún liggi vestan Mjólkursamlags. Kristján þór lagði þessar breytingar fram eftir samráð við íbúa á svæðinu og segir hann tilganginn að ýta til hliðar gömlu deilumáli um legu Dalsbrautar og Miðhúsabrautar. "Í kjölfarið munum við vinna að varanlegri sátt í góðri samvinnu og samráði við íbúana með öryggi gangandi og akandi að leiðarljósi," segir Kristján Þór.