Komi ekki að stofnun nýs skóla

Séra Hjalti Þorkelsson, fyrrverandi skólastjóri Landakotsskóla, segist ekki eiga hlut að stofnun nýs grunnskóla sem óánægðir kennarar við Landakotsskóla íhuga að setja á laggirnar í samvinnu við foreldra skólabarna. Samkvæmt heimildum fréttastofu Bylgjunnar er verið að setja saman undirbúningshóp fyrir stofnun nýs skóla, en kennarar og foreldrar eru ósáttir við ástandið í Landakotsskóla eins og það er, og telja að stjórn skólans sé með aðgerðum sínum að undanförnu að eyðileggja skólastarfið. Séra Hjalti Þorkelsson segir engan fót fyrir því að hann verði skólastjóri í nýjum skóla. Hann hefur ekki óskað eftir endurráðningu við Landakotsskóla og segir í yfirlýsingu sem hann sendi frá sér í dag að hann ætli ekki undir nokkrum kringumstæðum að taka við því starfi aftur, hvort sem núverandi stjórn situr áfram eða ekki. Hann hvetur bæði foreldra og kennara til að leita allra jákvæðra leiða svo unnt verði að koma á friði og sátt um framtíð skólans.