Sóknin á safnaðarheimilið

Sveinn Andri Sveinsson, lögmaður Hans Markúsar, segist ekki geta séð að það sé löglegt að úthýsa sóknarpresti með því að skipta um skrár í safnaðarheimili Garðasóknar. "Það er sóknin sem á safnaðarheimilið, en ekki sóknarnefndin." Matthías G. Pétursson, formaður Garðasóknar, sagðist í Fréttablaðinu í gær ekki telja sóknina hafa skyldu til að útvega sóknarprestinum vinnuaðstöðu ef hann hunsaði úrskurð áfrýjunarnefndar um flutning. Sveinn Andri telur sóknarnefndina jafnvel umboðslausa fyrst að aðalsafnaðarfundur var ekki haldinn í maí síðastliðnum. "Við höfum fengið mikil viðbrögð frá prestum sem eru mjög slegnir yfir þessum ummælum," segir Sveinn Andri. "Þetta er staðfesting á því hvar vandinn liggur í sókninni. Það hafa engar kvartanir komið frá sóknarbörnunum sjálfum, aðeins frá hluta starfsfólksins í sókninni." Ekki náðist í Matthías í gær.