Rjúpnastofninn vex um 80 prósent

Rjúpnastofninn stækkaði um tæplega 80 prósent milli ára samkvæmt tölum Náttúrufræðistofnunar Íslands. Stofnunin vill að veiðar verði takmarkaðar verulega, verði þær leyfðar á annað borð, svo að stofninn haldi áfram að vaxa. Rjúpur voru taldar á 41 svæði í öllum landshlutum í vor og sýna frumniðurstöður Náttúrufræðistofnunar að fjölgun varð á 36 svæðum en fækkun á sex miðað við árið 2004. Þó varð fjölgun í rjúpnastofninum í öllum landshlutum en hlutfallslega varð hún mest á Austurlandi, eða 145 prósent að meðaltali. Vöxturinn í stofninum var þó ekki eins mikill og í fyrra en þá var hann 104 prósent milli ára. Segir í tilkynningu frá Náttúrufræðistofnun að þessi mikli vöxtur tvö ár í röð eigi sér ekki hliðstæðu á síðari árum og að ástand rjúpnastofnsins sé í samræmi við þær væntingar sem gerðar hafi verið með tímabundinni friðun haustið 2003. Náttúrfræðistofnun leggur til að ef rjúpnaveiðar verði leyfðar aftur í haust verði þær takmarkaðar verulega þannig að þær dragi ekki úr möguleikum stofnsins til að ná aftur sambærilegri stærð og lengst af síðustu öld. Þá leggur stofnunin til að ekki verði leyft að veiða á tveimur stórum svæðum, á Suðvesturlandi og Norðausturlandi, á næstu árum vegna samanburðarrannsókna.