Meðalkostnaður tjóns 5,6 milljónir

Kostnaður við tjón á Suðurlandsvegi vegna árekstra á árinu 2003 nam rúmum einum milljarði króna. Meðalkostnaður við hvert tjón sama ár var rúmar 5,6 milljónir króna. Vinir Hellisheiðar kynntu samantekt sem unnnin var í samstarfi við tryggingafélögin um tjón sem hafa orðið á Suðurlandsvegi á kaflanum frá Reykjavík til Selfoss á árunum 1990 til 2005. Í samantektinni kemur í ljós að flest slysin hafa orðið á kaflanum frá gatnamótum Suðurlandsvegar og Vesturlandsvegar að Þrengslavegi en þar urðu 777 árekstrar á árabilinu 1990 til 2005 og fjöldi slasaðra var 447. Kostnaðurinn við tjón á þessum kafla nam rúmum 900 milljónum króna. Á árinu 2003 nam kostnaður samfélagsins vegna slysa á Suðurlandsvegi á milli 500 og 600 milljónum króna. Þegar tölur tryggingafélaganna eru teknar með í reikninginn hækkar kostnaðurinn verulega. Einar Guðmundsson, forvarnarfulltrúi Sjóvar, sem vann samantektina, segir að þá nemi kostnaðurinn rúmum milljarði á einu ári. Árið 2003 hafi reyndar verið óvenjumikið um tjón á þessu svæði en tölurnar séu engu að síður mjög háar. Á fundinum í dag afhentu Vinir Hellisheiðar sem berjast fyrir tvöföldun Suðurlandsvegar samgönguráðherra og fulltrúa vegagerðarinnar samantektina.