Samkeppnisstofnun varaði við sölu

Samkeppnisstofnun varaði við áhrifum af sölu grunnnets Landssímans fyrir fjórum árum. Stofnunin taldi það hafa alvarlegar afleiðingar ef ekki yrði gripið til hliðaraðgerða vegna símasölunnar. Hart var deilt um grunnnetið á Alþingi í morgun. Forsætisráðherra sagði m.a. að ekki kæmi til greina að aðskilja það frá Landssímanum áður en hann yrði seldur, jafnvel þótt meirihluti þjóðarinnar sé því fylgjandi. Kristján Möller, þingmaður Samfylkingar, spurði forsætisráðherra í morgun hvort Samkeppnisstofnun hefði skilað einkavæðinganefnd svartri skýrslu um alvarlegar afleiðingar þess að grunnetið yrði selt. Ef svo þá ættu allir þingmenn að fá að sjá þau gögn.  Samkvæmt heimildum fréttastofu bað einkavæðinganefnd um minnisblað frá Samkeppnisstofnun fyrir rúmum fjórum árum vegna sölu Landssímans. Þar bendir Samkeppnistofnun á að Landssíminn hafi í krafti eitt hundrað ára einokunar komið sér upp fullkomnu fjarskiptakerfi og eigi lagnir nánast að öllum heimilum og fyrirtækjum í landinu. Stofnunin taldi alvarlegt ef ekki yrði gripið til hliðaraðgerða við sölu Landssímans og dró upp tvo meginkosti. Annar er sá að aðskilja grunnetið frá Símanum en það tryggði fullkomið jafnræði milli keppinauta á markaði, yrði grunnnetið áfram í eigu ríkisins. Það drægi jafnframt úr yfirburðastöðu Landssímans í fjarskiptaþjónustu. Ókostur þess væri þó að það stuðlaði ekki að samkeppni í rekstri grunnkerfa. Það sé hins vegar óljóst hversu mörg grunnkerfi markaðurinn bæri. Kostur númer tvö sem Samkeppnisstofnun dregur fram er að gera Símanum að selja breiðbandið. Ef sú leið væri farin þyrfti að tryggja fullkominn aðgang keppinauta að heimtaug Landssímans. Innan Evrópusambandsins væri lögð áhersla á að grípa til beggja þessara aðgerða til að tryggja samkeppni. Samkeppnisstofnun bendir jafnframt á að í samrunamáli Telia og Telenor á Norðurlöndum hafi framkvæmdastjórnin fallist á samrunann, gegn því að fyrirtækin seldu frá sér kapalkerfin og norsk og sænsk stjórnvöld hafi tryggt ótakmarkaðan aðgang að heimtaugum fyrirtækjanna. Forsætisráðherra sagði á þinginu í dag að fyrirliggjandi sé heimild Alþingis frá árinu 2001 til að selja Símann í einu lagi. Sú ákvörðun grundvallaðist á áliti fjölda sérfræðinga - hvorki væri skynsamlegt né þörf  fyrir að aðskilja grunnnetið frá öðrum þjónustuþáttum fyrirtækisins.