Í lauginni undir áhrifum áfengis

"Það eru margir rússneskir og lettneskir togarar í Hafnarfirði þessa dagana og sjómennirnir koma í hópum í laugina til okkar. Þetta eru afskaplega prúðir drengir og eru ekki með nein leiðindi en við höfum ansi oft þurft að vísa þeim frá þar sem þeir hafa verið undir áhrifum áfengis," segir Daníel Pétursson, forstöðumaður Suðurbæjarlaugar í Hafnarfirði. "Þegar svona stórir hópar koma eru þeir auðvitað áberandi í laugunum og það er ærslagangur í þeim. Það er erfitt fyrir okkur að taka á móti svona stórum hópum og vísa þeim frá og það veldur okkur vissulega erfiðleikum. Þeir trufla gestina og því er engin furða að sundlaugargestir séu ekki ánægðir," segir Daníel en bætir við að sjómennirnir séu alls ekki ókurteisir. "Þeir hafa alltaf sætt sig við það þegar þeim er vísað á dyr og farið. Reglurnar hjá okkur eru öðruvísi en þeir eiga að venjast. Þó að þeir séu búnir að drekka þrjá til fjóra bjóra þá finnst þeim allt í lagi að fara í sund. Þetta er bara önnur menning."