Hefur ekki þegið fleiri boð

Dorrit Moussaieff forsetafrú hefur ekki þegið fleiri boð með einkaþotu Baugs en það, sem Séð og heyrt sagði frá í gær. Forsetaskrifstofan hefur gefið þá skýringu að Dorrit hafi hitt forstjóra Baugs og unnustu hans í Feneyjum og þá boðist að fljúga með þeim heim í einkaþotunni. Í tímaritinu Séð og heyrt eru birtar myndir af einkaflugvél Baugs þegar hún lenti með forsetafrúna, Jón Ásgeir Jóhannesson, forstjóra Baugs, og Ingibjörgu Pálmadóttur, unnustu hans, á Reykjavíkurflugvelli aðfararnótt síðastliðinn föstudag. Á flugvellinum beið Toyota Land Cruiser jeppi sem er í eigu forsetaembættisins eftir Dorrit. Þegar fréttastofa Bylgjunnar og Stöðvar tvö leitaði í gær svara við því hvers vegna forsetafrúin ferðaðist með einkaþotu Baugs og hvort það væri eðlilegt svaraði Örnólfur Thorsson, skrifstofustjóri forsetaskrifstofu, því að forsetaskrifstofan hefði hingað til ekki verið að elta ólar við frásagnir í Séð og heyrt um forsetann og fjölskyldu hans og hún ætlaði ekki að byrja á því núna. Forsetaskrifstofan hefur hins vegar séð ástæðu til að elta ólar við tímaritið þegar Morgunblaðið leitaði sömu skýringa. Í blaðinu í dag er haft eftir Örnólfi að þetta sé fyrsta og eina skiptið sem Dorrit hafi flogið með umræddri vél. Segir hann að flugferðin hafi komið þannig til að forsetafrúin hafi verið stödd í Feneyjum vegna sýningar Gabríelu Friðriksdóttur á Feneyjatvíæringnum og þar hafi hún hitt Jón Ásgeir og unnustu hans sem hafi boðið henni að þiggja flugfar í einkaþotu þeirra til Íslands. Þau lentu á Reykjavíkurflugvelli aðfaranótt föstudag og á föstudagskvöldið var Dorrit sérstakur gestur Jóns Ásgeirs og unnustu hans á tískusýningu Mosaic Fashion sem er í eigu Baugs. Athygli vakti að forsetafrúin kom á forsetabílnum í lögreglufylgd en Ólafur Ragnar Grímsson, forseti Íslands, var fjarri góðu gamni.