Frumvarp í flýtimeðferð

"Okkur þykir frumvarpið vera illa unnið og ekki taka almennilega á þessum málum," segir Halldór Þ. Sigurðsson, formaður Félags íslenskra atvinnuflugmanna, og á þar við frumvarp um starfsmannaleigur sem nú bíður afgreiðslu Alþingis.

"Við höfum verið að kvarta yfir því að samkeppnisstaða flugfélaga sé ekki jöfn í ljósi þess að sumir geta ráðið fólk í gegnum áhafnaleigur þar sem þeir skila ekki sköttum af þessari starfssemi til landsins eins og ríkisskattstjóri telur að eigi að gera," segir Halldór. Hann bendir á að leitað hafi verið umsagnar FÍA um frumvarpið en þegar á hólminn var komið hafi þeim verið tilkynnt að of seint væri að gera breytingar á frumvarpinu. "Þetta fær gífurlega flýtimeðferð í gegnum þingið."

Sævar Gunnarsson, formaður Sjómannasambands Íslands, kveðst geta tekið undir áhyggjur atvinnuflugmanna af þessum málum og að ósekju hefðu línurnar í frumvarpinu mátt vera skýrari. "Þetta varð lendingin. Lengra varð ekki komist í þessari sátt sem reynt var að ná um að keyra þetta í gegn núna," segir Sævar og bætir við: "Aftur á móti eru sjómenn mun betur settir að því leyti að það eru alveg skýrar línur um það hvenær þeir vinna samkvæmt íslensku kjarasamningum. Ef þeir eru um borð í íslensku skipi þá eru þeir á íslenskum kjarasamningum," segir Sævar.

Öðru máli gegnir um sjómenn sem sigla á íslenskum leiguskipum sem ekki eru í reglulegum siglingum til og frá landinu, en yfir þá starfsemi ná ekki íslenskir kjarasamningar, segir Sævar. Þar gildi svipað og um flugáhafnir íslenskra fyrirtækja sem nýti sér starfsmannaleigur.