Framkvæmdastjóri ekki í bókhaldinu

Fyrrum framkvæmdastjóri Japís neitaði í Héraðsdómi Reykjavíkur í gær að hafa átt þátt í ríflega 22 milljóna fjárdrætti í rekstri fyrirtækisins. Framkvæmdastjórinn segist ekki hafa komið að bókhaldi né daglegum fjármálum Japís þegar hann starfaði þar. Hann er ákærður ásamt Kristjáni Ra. Kristjánssyni, sem dæmdur var í tveggja ára fangelsi í héraðsdómi í fjárdráttarmáli Landssímans. Félagi Kristjáns, Árni Þór Vigfússon, sem hlaut sams konar dóm í Landssímamálinu, neitaði aðild að fjórtán milljóna fjárdrætti í rekstri Kaffi Le og Ísafoldshússins fyrir dómi í gær. Sá hluti ákærunnar er á hendur þeim fjórum sem komu að Landssímamálinu. Fyrri hluti málsins var tekinn fyrir í byrjun febrúar. Kristján Ra. játaði þá að hafa ekki staðið skil á 19 milljónum af rekstri Lífsstíls og Planet Reykjavík. Sveinbjörn bróðir hans játaði sinn hlut í sex milljóna fjárdrætti í Kaffi Le. Heildarupphæð ákærunnar nemur 47,5 milljónum. Málið verður tekið fyrir í maí að loknu Landssímamálinu fyrir hæstarétti.