Hrafnhildur formaður Samtakanna 78

Hrafnhildur Gunnarsdóttir kvikmyndagerðarkona var kjörin formaður Samtakanna 78, samtaka homma og lesbía á Íslandi, á nýafstöðnum aðalfundi. Ný í stjórn með Hrafnhildi eru Sigursteinn Másson, Guðbjörg Ottósdóttir, Rannveig Traustadóttir og Viðar Eggertsson en Þóra Björk Smith og Guðjón R. Jónasson voru endurkjörin. "Það vantaði einhvern til að taka þetta að sér, einhvern sem hefur sveigjanlegan vinnutíma til að geta sinnt formennskunni," segir Hrafnhildur sem varð við áskorunum félagsmanna um að bjóða sig fram. Langt er síðan hún gekk í Samtökin og er hún þar flestum hnútum kunnug. "Ég kom fyrst á vettvang Samtakanna 1981, þá sautján ára gömul, og hef alltaf átt regluleg samskipti við þau," segir Hrafnhildur en hún hún bjó í Bandaríkjunum í átján ár og hafði vitaskuld lítil afskipti af Samtökunum á meðan. Hrafnhildur tekur við formennsku af Þorvaldi Kristinssyni.