Órói á Gasa-ströndinni

Skömmu eftir miðnætti réðust óvopnaðir ísraelskir hermenn inn í nokkrar landnemabyggðir á Gasa-ströndinni og tóku til við að flytja landnemana á brott, með góðu eða illu. Frestur til að fara með friði og spekt rann út á miðnætti. Grátur og gnístran tanna voru friðsamlegustu viðbrögðin, víða létu landnemarnir öllum illum látum, grýttu hermennina og létu fúkyrðin fjúka. Drasli og dekkjum var staflað upp og kveikt í. Kona kveikti í sér framan við lögreglustöð og leigubílstjóri myrti farþega sína, tvo Palestínumenn, og annan til á víðavangi. Þrátt fyrir þetta gekk dagurinn betur en yfirvöld höfðu gert ráð fyrir. Undir kvöld var talið að um sextíu prósent landnema hefðu þegar yfirgefið Gasa, mun fleiri en búist hafði verið við. Engu að síður bíða hermannabyggðir þar sem þúsundir ungra harðlínuþjóðernissinna hafa komið sér fyrir og virðast reiðubúnir að láta sverfa til stáls. Þeir eru margir sannfærðir um að guð hafi fært gyðingum í Ísrael þetta landsvæði og að stjórnvöld hafi ekkert með það að gera að afhenda Palestínumönnum það, þó að samkvæmt alþjóðalögum hafi Ísraelsmenn hernumið það fyrir þrjátíu og átta árum. Ariel Sharon, forsætisráðherra Ísraels og hugmyndasmiðurinn á bak við brotthvarfið, kvaðst hafa tárast þegar hann sá fyrstu myndirnar af landnemum sem yfirgáfu heimili sín í síðasta sinn. Hann sagðist hafa beðið alla að yfirgefa heimili sín með friðsömum hætti og ráðast á lögæsluliðið. Hann bað Gyðinga um að láta þá í friði og ráðast frekar á sig þar sem hann bæi ábyrgð. Palestínumenn fagna tímamótunum en telja björninn þó ekki unninn. Þetta kort skýrir af hverju: Gasa-ströndin er tiltölulega lítið landsvæði þó að þar búi margir. Landnemarnir þar eru þó aðeins taldir hafa verið um átta þúsund og fimm hundruð. Á Vesturbakkanum er málum öðruvísi komið. Þó að fjarlægja eigi nokkrar landnemabyggðir þar óttast margir Palestínumenn að Sharon hyggist fremur herða tökin þar en hitt, enda er um stærra svæði að ræða og þar búa tvö hundruð og fjörutíu þúsund landnemar, sem gerir nærri tíu prósent íbúanna þar.