Salka Valka á fjalirnar

"Ég hlakka mikið til að takast á við þetta verkefni, enda sagan mjög þýðingarmikil fyrir mig," segir Edda Heiðrún Bachman sem leikstýrir í haust uppfærslu á Sölku Völku eftir Halldór Laxness. Stöð 2 hitti leikstjórann og leikara á Gljúfrasteini í dag. Salka Valka er þroskasaga Sölku og pólitísk ástarsaga hennar og Arnaldar sem leikinn er af Sveini Þóri Geirssyni. Þá mun Halldóra Geirharðsdóttir fara með hlutverk Sigurlínu og Ellert Ingimundarson með hlutverk Steinþórs. Þegar bókin kom út í fyrsta sinn, á árunum 1931-32, voru mikil stéttaátök og kreppa á Íslandi. Sagan er heimild um þessa tíma og áhuga skáldsins á högum íslenskrar alþýðu. Edda Heiðrún mun leikstýra verkinu sem sett verður upp í Borgarleikhúsinu í haust en bókin hefur lengi verið í uppáhaldi hjá leikkonunni eða frá því hún var unglingur. Hún segir bókina hafa verið skyldulesningu á sínu heimili og kveðst lesa Sölku reglulega á nokkura ára fresti, bæði til að hressa upp á sjálfsímyndina og eins til skemmtunar. Imur Kristjánsdóttir, sem mun fara með hlutverk Sölku, segir að um draumahlutverk sé að ræða fyrir allar leikkonur. Og leikkonurnar eru sammála um að Salka búi í okkur öllum. Ilmur segir að margt fólk og ólíkt hafi sagt sér að það sjái svo mikla Sölku í sjálfu sér og hún þurfi því að reyna að finna einhvern kjarna sem allir þekki. Salka Valka hefur verið sett upp með reglulegu millibili í gegnum árin en Edda segir mikilvægt að nýjar leikgerðir séu gerðar á hverjum tíma. Frumskilyrðið fyrir því að halda þessum sögum vakandi sé að setja sögurnar inn í leikformið og nýjar leikgerðir. Gömlu leikgerðirnar séu ágætar fyrir sinn tíma og stað en sjálfsagt sé að ný kynslóð komi með nýjar áherslur; þannig nái verkið líka til nýju kynslóðarinnar.