Slettu á ráðstefnugesti

Lögreglan í Reykjavík handtók þrjá mótmælendur, tvo karlmenn og eina konu, eftir hádegið sem ruddust inn á alþjóðlega álráðstefnu sem nú fer fram á Nordica-hóteli í Reykjavík og slettu því sem líktist grænni súrmjólk á ráðstefnugesti. Tveir mótmælendanna, karl og kona, eru íslensk en annar karlmannanna er enskur. Tvö hundruð fulltrúar áliðnaðar frá mörgum löndum sitja ráðstefnuna. Ráðstefnugestum var mjög brugðið en fyrir mótmælendum virtist vaka að sletta á Tómas Má Sigurðsson, framkvæmdastjóra Fjarðaráls, og Joe Wabha, verkefnisstjóra Fjarðaráls. Lögreglan segir að fólkið hafi valdið tjóni á tölvubúnaði og fatnaði ráðstefnugesta. Í fréttatilkynningu frá Náttúruvaktinni segir að hafi málningu verið slett þyki Náttúruvaktinni það leitt enda hafi verið ætlunin að nota þetta tækifæri til að upplýsa gesti fundarins um yfirvofandi eyðileggingu á íslenskum náttúruperlum. Náttúruvaktin voni að málningin hafi verið umhverfisvæn og bendir á að hafi spjöll verið unnin séu þau fullkomlega afturkræf sem er annað en segja megi um fyrirhugaða aðför álrisanna að Jökulsám Skagafjarðar, Skjálfandafljóti, Langasjó, Þjórsárverum og hálendinu norðan Vatnajökuls.